Bix a bele'ex in wet láak'e'ex.

 

Lete' chan ts'íikbala' ken a xooke'ex jump'éel tsikbal tan u yúuchul tin kuxtal. a wojle'ex  ts'o'ok in nojochtal ka tin  kaanaj le maayao'. ba'ale'  bey xan a wojle'ex juntuul maaya ma' chéen yo'olal ku  t'aanik le maayao', wa ku buukintuk le nook'o  bey xan yo'olal bix u tuukul yéetel  ichil u puksi'ik'al. a wojle'ex beyxan  ka'anchaj in xook yo'olal máaxeni (maayaen).

 

Ba'ale' tin wilik  bejlae tuláakal le ba'alob ts'o'ok in beetiko'  yéetel in xookiko' mix u beelal wa ma' tin wa'alik ba'ax tan u yúuchul tu'ux tin tukultaj yaan u beetik ka beyak u chíinjo'oltal le máasewáal t'aano'obo'. le INALIo'.  lúuban in wóol ba'ale' le jump'íit múuk' yaan teno' kin tsikbaltike'ex le je'ela'.  Te'e kuuchila' ku ts'aabal  jump'éel tséel le wíiniko'ob ku t'aaniko'ob le yáax t'aano'ob ti' u lu'umil Meejiko kex  yaan to'on xook yéetel wojel le meyajo'  ku  yoksko'ob meyaj uláak' máako'ob tumen ku ya'aliko'ob  ma' tu beytal u ts'aikto'on  le meyajo' tumen ma' k'uuchuk u k'iinil wa chéen chí'ibal pool ts'aík, ma' k ojel ts'ìib yéetel xook. yéetel ku tukultiko'ob mina'anto'on puksi'ik'al.  Wa k líik'sik k t'aan ku ya'aliko'ob tan k chi'ik u k'aab le máax ku ts'aikto'on le janalo'. kin tukultik túun  máaxo'ob ku ts'aik to'on le janalo', chéen le máasewáal wíiniko'ob tumen tan k meyaj yo'olal leti'ob, yéetel wa tank chi'ik u k'aabo'ob  kin na'atik beyo' leti'ob ku yiliko'on bey pek'o'on?

 

In wojel lete' ts'iibaj yaan u yojeltik le Máax ku jo'olintik le INALIo', in wojel bey xan yo'olal ma' tin p'aatinbaj yéetel tin wa'alaj ti' leti' le ba'ax kin tukultiko' yéetel le discriminación ku beetik  le máaxo'ob ku meyajo'ob tu tséel leti' yaan in joksa'al tin meyaj, ba'ale bey xan in wojel yaanten ka'ap'éel k'aab ti'al in meyaj yéetel u yáantaj kichkelem Yuum, le máax ku ts'aikten kuxtal yéetel múuk'.

 

let'e ju'un kin túuxtik te'ex jump'éel  in wet meyaj tu ya'alaj ti' jump'éel periódico, bejlae'  leti' ts'o'ok u jok'sal te'e INALIo' tumen  tu líisa'j u t'aan.

 

 

Beora kin k'aatik tech yaan a líisik a t'aan? wa yaan a p'aatik chéen beyo'  ti'al tu paach k'iinil ka peechatakech tech yéetel  a paalalo'ob wa a láak'o'ob. Ba'ale' wa a yabilmaj a kaaj,  a láak'o¡ob yéetel ku máan k'i'ik ta wíinkilil ts'íib ti' le  máax ku jo'olintik le INALIo' baxten ku cha'ik ka úuchuk le je'ela yéetel ba'ax tan u beetik yo'olal le máasewáal kaajo'obo'. Bey xan máansej ti' uláak' máako'ob.

 

Kin túuxtik te'ex `ka'ap'éel ju'uno'ob le yáaxo' tu'ux jok' te'e periódicoo le uláak'o jump'éel ju'un k'ubaj ti' le jo'olpopilo'.